Shërbimi i Inteligjencës së Jashtme Ruse (SVR) akuzoi të martën Mbretëria e Bashkuar dhe Franca se po punojnë aktivisht për t’i siguruar Ukrainës një bombë bërthamore, raporton AA.com.
Në një deklaratë zyrtare, SVR pretendoi se Londra dhe Parisi besojnë se, duke zotëruar armë bërthamore, Kievi do të ishte në gjendje të siguronte kushte më të favorshme për përfundimin e konfliktit.
“Besohet se Ukrainës duhet t’i furnizohet një ‘armë çudibërëse’. Kievi do të jetë në gjendje të kërkojë kushte më të favorshme për t’i dhënë fund armiqësive nëse zotëron një bombë atomike, ose të paktën një të ashtuquajtur bombë ‘të ndyrë’”, thuhet në deklaratë.
Sipas SVR-së, Gjermania “me mençuri refuzoi të merrte pjesë në këtë aventurë të rrezikshme”.
Shërbimi rus i inteligjencës pretendon se Londra dhe Parisi aktualisht po shqyrtojnë çështje që lidhen me furnizimin e Kievit me armë të tilla dhe me sistemet përkatëse të shpërndarjes.
“Po flasim për transferimin e fshehtë në Ukrainë të komponentëve, pajisjeve dhe teknologjive evropiane në këtë fushë. Një nga opsionet që po merret në konsideratë është koka luftarake kompakte franceze TN75 për raketën balistike M51.1, e lëshuar nga nëndetësja”, thuhet më tej në deklaratë.
SVR thekson se “britanikët dhe francezët janë të vetëdijshëm se planet e tyre përbëjnë një shkelje të rëndë të së drejtës ndërkombëtare”, veçanërisht të Traktatit për Mospërhapjen e Armëve Bërthamore, dhe se këto veprime shoqërohen me rrezikun e minimit të regjimit global të mospërhapjes.
“Në këtë drejtim, përpjekjet kryesore të perëndimorëve janë të përqendruara që shfaqja e armëve bërthamore në Kiev të paraqitet si rezultat i zhvillimit të brendshëm nga vetë ukrainasit”, shton deklarata.
Shërbimi rus i inteligjencës akuzoi gjithashtu Parisin dhe Londrën se kanë “humbur ndjenjën e realitetit”, duke theksuar se “shpresojnë më kot të shmangin përgjegjësinë”.
“Çdo gjë sekrete, në mënyrë të pashmangshme, bëhet e dukshme. Në qarqet ushtarake, politike dhe diplomatike të Britanisë së Madhe dhe Francës ka shumë njerëz të arsyeshëm që e kuptojnë rrezikun që veprimet e pamatura të udhëheqësve të tyre paraqesin për të gjithë botën”, theksohet në deklaratë.
Në reagim ndaj deklaratës së SVR-së, dhoma e sipërme e parlamentit rus, Këshilli i Federatës, u bëri thirrje ligjvënësve në Londër dhe Paris, si dhe organizatave ndërkombëtare, të hetojnë pretendimet mbi qëllimin e Britanisë dhe Francës për të furnizuar Kievin me pajisje shpërthyese bërthamore.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
