Arkeologët egjiptianë kanë zbuluar një seri varresh që datojnë rreth 2 mijë vjet më parë në bregdetin e Mesdheut, si dhe mbetjet e një qyteti të epokës bizantine në shkretëtirën perëndimore të Egjiptit.
Sipas Ministrisë së Turizmit dhe Antikiteteve të Egjiptit, gërmimet e fundit në zonën e Marina El-Alamein, rreth 100 kilometra në perëndim të Aleksandrisë, kanë nxjerrë në dritë 18 varre të periudhës greko-romake. Arkeologët kanë zbuluar disa dhoma varrimi, pllakat prej guri të të cilave ishin ende të paprekura. Gjithashtu, është gjetur një sarkofag graniti rreth 2.5 metra i gjatë, me kapakun ende të mbyllur, çka sugjeron se varri ka mbetur i vulosur për afro dy mijëvjeçarë.
Brenda varreve janë gjetur mbetje njerëzore, enë qeramike, amfora dhe objekte të tjera funerale.
Një nga zbulimet më të rëndësishme është gjetja e 24 objekteve prej ari të vendosura në gojën e disa të vdekurve, një praktikë funerale e lidhur me besimet e lashta për jetën pas vdekjes. Autoritetet egjiptiane e konsiderojnë këtë një zbulim me rëndësi të madhe për studimin e historisë dhe zakoneve funerale të periudhës greko-romake dhe asaj bizantine në rajon.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
