Përpjekjet e BE-së për një 'mur dronësh' kundër Rusisë hasin pengesa politike dhe teknike

Bashkimi Evropian po përpiqet të përshpejtojë ngritjen e një “muri dronësh” përgjatë kufirit lindor për t’u mbrojtur nga kërcënimet ajrore ruse, por projekti po has në vështirësi të mëdha politike dhe teknike.

Vetëm disa orë pasi rreth 20 dronë rusë hynë në hapësirën ajrore polake muajin e kaluar, Presidentja e Komisionit Evropian Ursula von der Leyen tha se ishte koha që Evropa të ndërtonte një "mur dronësh" për të mbrojtur krahun e saj lindor.

Incidentet e dronëve mbi aeroportet në Danimarkë dhe Gjermani në javët në vijim përforcuan pikëpamjen e udhëheqësve evropianë se kontinenti ka nevojë urgjente për mbrojtje më të mirë kundër kërcënimeve të tilla.

Sipas agjencisë Reuters, disa vende anëtare të BE-së po kërkojnë bashkëpunim të ngushtë për të krijuar një rrjet të përbashkët mbrojtjeje ajrore që do të përfshinte radarë, sisteme anti-dronë dhe koordinim me NATO-n. 

Megjithatë, mungesa e financimeve të përbashkëta dhe dallimet politike mes vendeve po e ngadalësojnë procesin.

"Kapacitetet tona janë realisht, për momentin, mjaft të kufizuara", tha Komisioneri Evropian i Mbrojtjes, Andrius Kubilius, i cili po luan një rol udhëheqës në propozim.

Kubilius i tha Reuters se BE-së do t'i duhet të mbështetet shumë në ekspertizën ukrainase, të përpunuar gjatë gati katër viteve në kundërshtimin e valëve të dronëve rusë.

Ngjarjet e fundit në Poloni kanë shtuar urgjencën për këtë projekt. Disa dronë rusë kanë shkelur hapësirën ajrore polake gjatë një sulmi ndaj Ukrainës, me disa prej tyre të rrëzuar nga ushtria polake me mbështetjen e aleatëve të NATO-s.

Në një fshat të Lublinit, zjarrfikësit po punojnë për të riparuar çatinë e një shtëpie të dëmtuar nga rrëzimi i një droni, ndërsa policia ruan zonën. Ngjarja ka rritur ndjenjën e pasigurisë mes banorëve lokalë dhe ka forcuar thirrjet për një reagim më të fortë të BE-së kundër kërcënimeve ajrore nga Rusia.