Finlanda tha të premten se aktiviteti i dyshuar i dronëve në qiellin mbi rajonin e kryeqytetit të vendit nuk përbën më kërcënim dhe se situata po kthehej në normalitet ndërsa aeroporti i Helsinkit u rihap.
Më herët Departamenti i Shpëtimit i Qytetit të Helsinkit i kishte paralajmëruar 1.8 milion banorët e rajonit Uusimaa në Finlandën jugore, ku përfshihet edhe kryeqyteti, të qëndronin brenda ndërsa situata zhvillohej.
Finlanda dhe shtetet fqinje baltike të Estonisë, Letonisë dhe Lituanisë kanë parë një sërë incidentesh të kohëve të fundit ku dronë ukrainas të drejtuar kundër Rusisë kanë hyrë në hapësirën e tyre ajrore, por nuk dihet menjëherë nëse incidenti i së premtes ishte i ngjashëm.
Forcat mbrojtëse finlandeze ngritën në ajër avionët luftarakë dhe shërbimet e tjera të emergjencës në përgjigje të situatës.
“Autoritetet tona demonstruan gatishmërinë dhe aftësinë e tyre për të reaguar. Nuk ka asnjë kërcënim të drejtpërdrejtë ushtarak kundër Finlandës”, shkroi Presidenti Alexander Stubb në rrjetet sociale X.
Ministrja e Brendshme Mari Rantanen tha se ishte e sigurt që njerëzit të shkonin në punë dhe në shkollë.
Trafiku në aeroportin e Helsinkit rifilloi gjithashtu pas një pezullimi tre-orësh, sipas një deklarate në faqen e saj të internetit.
“Autoritetet po ndërmarrin veprime. Forcat e Mbrojtjes kanë rritur aftësitë e tyre të mbikëqyrjes dhe reagimit. I bëj thirrje të gjithëve të ndjekin buletinet e autoriteteve”, shkroi kryeministri Petteri Orpo në X.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
