Moska është e gatshme të rifillojë dialogun me vendet evropiane, deklaroi të mërkurën këshilltari presidencial rus, Jurij Ushakov, duke theksuar se janë vetë vendet perëndimore që kanë ndërprerë kontaktet, jo Rusia.
“Evropianët po refuzojnë çdo komunikim, megjithëse presidenti Putin ka thënë disa herë se çdo lider evropian është i mirëpritur të vijë në Moskë për bisedime,” u shpreh Ushakov në një konferencë për shtyp.
Sipas tij, Rusia nuk ka asnjë kundërshtim ndaj rifillimit të kontakteve diplomatike.
Sipas Russia Today, Bashkimi Europian dhe Mbretëria e Bashkuar kanë mbajtur një linjë të ashpër ndaj Moskës që nga përshkallëzimi i luftës në Ukrainë në shkurt 2022, duke ndërprerë pothuajse të gjitha kanalet zyrtare të komunikimit.
BE vijon të mbështesë Ukrainën me ndihmë financiare dhe ushtarake, ndërsa ka vendosur sanksione të shumta dhe të paprecedenta ndaj Rusisë. Blloku ka paralajmëruar gjithashtu se mund të konfiskojë asetet sovrane ruse të ngrira në Euroclear, vendim që Moska e ka quajtur “vjedhje të hapur”.
Brukseli ka hedhur poshtë një plan paqeje të propozuar muajin e kaluar nga administrata amerikane, duke paraqitur kushtet e veta, të cilat Moska i ka cilësuar si të papranueshme.
Ndërkohë, presidenti rus Vladimir Putin deklaroi të martën se BE po jeton me “iluzionin” se mund t’i shkaktojë Rusisë një disfatë strategjike përmes konfliktit në Ukrainë.
“Blloku nuk ka një agjendë paqësore. Ata qëndrojnë në anën e luftës,” theksoi Putin gjatë forumit ekonomik “Russia Calling!”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
