Britania kap avionë rusë në misionin e zgjeruar të NATO-s në Arktik

Britania e Madhe ka interceptuar dy avionë ushtarakë rusë pasi grupi i saj i aeroplanmbajtëses u dislokua në Arktik në kuadër të operacioneve të zgjeruara të NATO-s.

Sipas Ministrisë britanike të Mbrojtjes, dy avionë patrullues detarë rusë të tipit “Bear F” iu afruan disa herë grupit të sulmit të aeroplanmbajtëses HMS Prince of Wales në Detin Norvegjez, në një veprim që u cilësua si “i pasigurt dhe joprofesional”.

Autoritetet britanike thanë se avionët rusë hodhën një numër të madh sonobojash, pajisje që funksionojnë si mikrofonë nënujorë për zbulimin dhe gjurmimin e nëndetëseve, pranë aeroplanmbajtëses britanike.

Më 2 korrik, avionët rusë u interceptuan dhe u shoqëruan jashtë zonës nga avionët luftarakë britanikë F-35, të ngritur nga HMS Prince of Wales. Kjo anije është aeroplanmbajtësja e parë evropiane që kryen misione të mbrojtjes ajrore të NATO-s me avionë F-35.

Ky zhvillim vjen në një kohë kur Britania e Madhe ka marrë për herë të parë drejtimin e njësisë së forcave të reagimit të shpejtë të NATO-s, të cilën Ministria e Mbrojtjes e përshkruan si “maja e shtizës” së aleancës, me aftësinë për t'u dislokuar në çdo pjesë të botës brenda pak ditësh.

Ndërkohë, javën e kaluar u raportua se superjahti me vlerë rreth 100 milionë paund, i lidhur me presidentin rus Vladimir Putin, po lundronte përgjatë brigjeve të Norvegjisë në rrugën e kthimit drejt Rusisë.

Në një intervistë për Politico, sekretari britanik i Mbrojtjes, Dan Jarvis, nuk pranoi të konfirmonte nëse HMS Prince of Wales po monitoronte jahtin, por deklaroi: “Ne e dimë se ku ndodhet. Fakti që jahti është në lëvizje është një tjetër tregues se Putini po përballet me presion në rritje.”