Dy nga aktivistët e flotiljes Sumud të cilët mbërritën në Turqi pasi u deportuan nga Izraeli kanë pohuar se aktivistja suedeze Greta Thunberg është keqtrajtuar gjatë ndalimit të saj.
Izraeli nuk ka komentuar mbi këto akuza, por Ministria e Jashtme izraelite më parë i kishte denoncuar si krejtësisht të rreme akuzat për keqtrajtim të aktivistëve.
Të shtunën pasdite, 137 aktivistë mbërritën në Stamboll, nga të cilët 36 janë turq dhe pjesa tjetër nga SHBA-të, Emiratet e Bashkuara Arabe, Algjeria, Maroku, Italia, Kuvajti, Libia, Malajzia, Mauritania, Zvicra, Tunizia dhe Jordania, sipas Ministrisë së Jashtme turke.
Dy aktivistë, malajziani Khajuani Helmi dhe amerikani Windfield Beaver, i thanë Reuters se ishin dëshmitarë të keqtrajtimit që pësoi Thunberg, duke thënë se ajo u shty dhe u detyrua të mbante një flamur izraelit.
“Ishte shkatërruese. Na trajtuan si kafshë”, tha 28-vjeçari Helmi, duke pretenduar se nuk u dhanë ushqim ose ujë të pastër dhe se ilaçet dhe sendet e tyre personale u konfiskuan.
Biver, 43 vjeç, tha se trajtimi i Thunberg ishte i tmerrshëm dhe se ajo po përdorej “për propagandë”, duke përshkruar se si u shty në një dhomë kur mbërriti Ministri i Sigurisë Kombëtare i Izraelit, Itamar Ben-Gvir, i cili është i djathtë ekstrem.
Ministria e Jashtme izraelite tha nëpërmjet platformës X se të gjithë të ndaluarit ishin të sigurt dhe mirë dhe se deportimet e tyre do të përfundonin sa më shpejt të jetë e mundur.
Në një postim tjetër, ministria akuzoi disa nga anëtarët e flotiljes për “pengim të qëllimshëm” të procesit të deportimit.
Ministri i Jashtëm italian Antonio Tajani tha më parë se 26 italianë ishin midis 137 të deportuarve, ndërsa 15 të tjerë mbeten në Izrael dhe do të deportohen në ditët në vijim.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
