Pesë alpinistë boshnjakë dyshohet se kanë gjetur vdekjen në malin Elbrus të Rusisë, malin më të lartë në Evropë, pasi u përfshinë në një stuhi të dhunshme, njoftoi të dielën një shërbim shpëtimi alpinistësh boshnjakë, ndërsa ekipet ruse të shpëtimit vazhduan të kërkonin trupat.
Ministria e Emergjencave e Rusisë tha se ekipet e shpëtimit kishin shpëtuar dy alpinistë të tjerë, të cilët u evakuuan nga mali dhe u dërguan për kujdes mjekësor.
Ministria deklaroi se trupat e dy anëtarëve të tjerë të të njëjtit grup ishin gjetur në mal në një lartësi prej 5350 metrash dhe do të evakuoheshin kur kushtet e motit të lejonin.
Kërkimi për tre trupat e tjerë është duke vazhduar, shtoi ministria, pa specifikuar kombësinë e tyre.
Mali Elbrus, i cili ngrihet në 5642 metra, pak në veri të kufirit me Gjeorgjinë, është i famshëm për ndryshimet e papritura të motit dhe kushtet e ngjitjes.
Mediat boshnjake raportuan se shtatë anëtarët e ekspeditës ngjitëse ishin banorë të qytetit qendror të Zenicës dhe përfshinin një çift të martuar dhe një mjek që punonte në spitalin lokal.
Mediat ruse raportuan se kushtet e pafavorshme të motit dhe erërat e forta, kishin komplikuar operacionet e kërkimit dhe të rikuperimit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
