Çmimet prestigjioze Academy Awards do të lënë shtëpinë e tyre tradicionale në zemër të Hollywood-it dhe do të zhvendosen në një vend të ri duke filluar nga viti 2029.
Akademia e Arteve dhe Shkencave të Filmit njoftoi se ceremonia do të mbahet në Peacock Theater, një hapësirë më e madhe në kompleksin LA Live në Los Angeles. Aktualisht, Oscarët zhvillohen në Dolby Theatre, ku janë mbajtur që nga viti 2002.
Sipas Akademisë, zhvendosja është pjesë e një marrëveshjeje shumëvjeçare me AEG, që menaxhon kompleksin LA Live dhe organizon evente të mëdha si Emmy dhe Grammy.
“LA Live është ndërtuar për momente që përcaktojnë kulturën dhe nuk ka skenë më të madhe globale se Oscarët,” u shpreh Todd Goldstein, drejtues i AEG.
Ceremonia do të largohet kështu nga zona ikonike e Hollywood Boulevard dhe Hollywood Walk of Fame, por njëkohësisht përfaqëson një rikthim në një zonë më qendrore të qytetit, ku Oscarët janë mbajtur edhe më herët.
Ndryshimi vjen paralelisht me një transformim të madh në transmetim: nga viti 2029, ceremonia nuk do të transmetohet më në ABC, por do të kalojë në platformën YouTube, ku do të shfaqet drejtpërdrejt dhe falas për publikun global.
Megjithatë, ceremonia e 100-vjetorit në vitin 2028 do të mbahet ende në Dolby Theatre dhe do të transmetohet në ABC, përpara se të nisë epoka e re për Oscarët.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
