Trupi i pajetë i një gazetari të ri u gjet të premten, në një zonë të Kolumbisë veriperëndimore ku veprojnë organizata të armatosura të përfshira në trafikun e drogës dhe tregtinë e arit të nxjerrë në mënyrë të paligjshme, konfirmoi presidenti i vendit, Gustavo Petro.
Mateo Perez, 25 vjeç, u zhduk të martën ndërsa raportonte për dhunën në një zonë rurale në departamentin e Antioquia, në veriperëndim, ku veprojnë si disidentët e ish-Forcave të Armatosura Revolucionare të Kolumbisë (FARC) ashtu edhe trafikantët e drogës të Clan del Golfo, karteli më i fuqishëm në vendin e Amerikës Latine, raportoi fillimisht Fondacioni për Lirinë e Shtypit (FLIP) nëpërmjet X.
“Ai u vra nga John Edison Chala Torrejano”, deklaroi Presidenti Petro në X, duke shtuar se ekipi i Edison Chala është i përkushtuar për të kontrolluar minierat e paligjshme të arit.
Kreu i shtetit shtoi se Kryqi i Kuq dhe Avokati i Popullit, me mbështetjen e qeverisë, arritën të hynin në zonë dhe të gjenin trupin.
Zona e Brisenos, ku gazetari u gjet i vdekur, është, sipas Presidentit Pedro, “Zona ku është regjistruar shkalla më e lartë e vrasjeve në të gjithë Kolumbinë”.
Ministri kolumbian i Mbrojtjes, Pedro Sanchez, kishte njoftuar se do të kryhej një operacion ushtarak për të gjetur gazetarin dhe studentin e ri.
Mateo Perez, drejtor i revistës dixhitale El Confidente de Yarumal, nuk hezitoi pavarësisht kërcënimeve që kishte marrë, të mbulonte çështjet politike, krimin dhe korrupsionin.
Gazetarët në Kolumbi shpesh jetojnë nën kërcënimin e grupeve të armatosura që kontrollojnë sipërfaqe të gjera të vendit, duke fituar jetesën nga trafiku i kokainës, minierat e paligjshme dhe zhvatja.
Të paktën 170 gazetarë janë vrarë në Kolumbi që nga viti 1977.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
