YouTube ka kaluar Netflix për sa i përket kohës mesatare të shikimit në ditë në nivel global, sipas një analize të re që nxjerr në pah ndikimin në rritje të platformës së videove në peizazhin mediatik botëror.
Rritja e shikimit të YouTube përmes televizorëve ka forcuar konkurrencën mes platformave më të mëdha të transmetimit dhe atyre dixhitale. Duke komentuar këtë zhvillim, bashkëdrejtori ekzekutiv i Netflix, Ted Sarandos, tha: “YouTube nuk është më vetëm video me mace. YouTube është TV.”
Sipas të dhënave të agjencisë Digital i, të mbledhura në 20 tregje ndërkombëtare, përdorimi mesatar ditor për një llogari YouTube u rrit nga 87.2 minuta në vitin 2024 në 99.1 minuta gjatë vitit 2025. Në të njëjtën periudhë, koha mesatare e shikimit në Netflix ra nga 100.5 në 93.4 minuta në ditë.
Në Mbretërinë e Bashkuar, Netflix vazhdon të mbajë një avantazh të lehtë. Gjatë vitit të kaluar, një përdorues i Netflix shpenzoi mesatarisht 88.2 minuta në ditë në platformë, ndërsa një përdorues i YouTube 84.8 minuta.
Kalimi i audiencës nga telefonat dhe laptopët drejt televizorëve është përshpejtuar ndjeshëm. Pjesa e shikimit të YouTube përmes televizionit u rrit nga 28% në 35% mes janarit 2024 dhe dhjetorit 2025, ndërsa përdorimi në pajisjet mobile ra nga 35% në 31%.
Ironikisht, edhe vetë Netflix është bërë një nga përfituesit më të mëdhenj të YouTube. Kanali zyrtar i kompanisë arriti shtrirjen më të madhe në platformë gjatë vitit të kaluar, duke prekur 78.2 milionë llogari unike.
Në përmbajtjen e tij përfshihen edhe episode të plota të dokumentarit “Our Planet”, të narruara nga David Attenborough.
Të dy gjigantët e medias po hyjnë gjithnjë e më shumë në territoret tradicionale të njëri-tjetrit. YouTube, që është në pronësi të Alphabet, po zgjeron praninë e tij në fusha që më parë dominoheshin nga televizionet dhe transmetuesit klasikë.
Një nga lëvizjet më të rëndësishme ishte sigurimi i të drejtave ekskluzive për transmetimin e ceremonisë së ndarjes së çmimeve Oscar, në kuadër të një marrëveshjeje shumëvjeçare që përfshin edhe mbulimin e tapetit të kuq dhe materialeve prapa skenave.
Platforma po investon gjithashtu në sport. Vitin e kaluar ajo transmetoi ndeshjen e saj të parë të NFL-së, e cila vendosi rekord si transmetimi i drejtpërdrejtë me audiencën më të madhe në historinë e platformës, duke grumbulluar mbi 17.3 milionë shikues njëkohësisht.
Nga ana tjetër, Netflix po përpiqet të përfitojë nga popullariteti në rritje i podkasteve video. Kompania ka arritur një marrëveshje me podkastin “The Rest Is Football”, ku marrin pjesë Gary Lineker, Alan Shearer dhe Micah Richards, për transmetimin e edicioneve të përditshme gjatë Kupës së Botës.
Një nga dallimet kryesore mes dy platformave mbetet mënyra e krijimit të përmbajtjes. Ndryshe nga transmetuesit tradicionalë apo institucionet publike si BBC, YouTube nuk porosit programe origjinale. Përpjekjet e mëparshme përmes projekteve YouTube Red dhe YouTube Originals u ndërprenë pas mbylljes së tyre.
Analiza e Digital i tregon se mediat tradicionale po arrijnë të gjejnë gjithnjë e më shumë sukses në YouTube. Mes kanaleve më të ndjekura ishin “Saturday Night Live”, me 55.8 milionë shikues, dhe “Universal Pictures”, me 54.6 milionë.
Duke komentuar këto zhvillime, drejtori i analizave në Digital i, Matt Ross, deklaroi: “Evolucioni i YouTube nga një shërbim videosh sociale në një platformë dominuese globale të vëmendjes është një nga ndryshimet përcaktuese mediatike të dekadës. Të dhënat tona tregojnë se audiencat po e trajtojnë gjithnjë e më shumë YouTube jo si media sociale, por si një destinacion kryesor argëtimi.”
Gjenerata Z mbetet grupi më aktiv në platformë, me një mesatare prej 111 minutash shikim në ditë. Megjithatë, rritja më e fortë u regjistrua te meshkujt e moshës 55-64 vjeç, përdorimi i të cilëve është rritur me 15% krahasuar me vitin 2024.
Edhe gratë e të gjitha grupmoshave shënuan rritje në kohën e kaluar në platformë.
Në nivel global, Koreja e Jugut rezultoi tregu me përdorimin më të lartë të YouTube, me 161.5 minuta në ditë për përdorues. Ndërkohë, Franca regjistroi rritjen më të madhe vjetore të shikueshmërisë.
Rritja e ndikimit të YouTube në Mbretërinë e Bashkuar ka tërhequr vëmendjen e autoriteteve dhe rregullatorëve, të cilët kanë sinjalizuar mundësinë që BBC dhe ITV të përfitojnë nga një status i veçantë dhe më i dukshëm brenda platformës.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
