BE i kërkon Ukrainës të lejojë aksesin në tubacionin që transporton naftën ruse

Ukraina ndodhet nën presion të madh për të lejuar ekspertët e Bashkimit Evropian të inspektojnë një tubacion të rëndësishëm që transporton naftë ruse drejt Hungarisë dhe Sllovakisë.

Ky tubacion, i njohur si Druzhba, është jetik për furnizimin me naftë të Evropës Qendrore, dhe situata ka shkaktuar tensione midis Kievit dhe dy vendeve që varen nga kjo naftë.

Ukraina argumenton se tubacioni është dëmtuar nga një sulm ajror rus në janar dhe se ka nevojë për kohë për ta riparuar plotësisht. 

Megjithatë, Hungaria dhe Sllovakia pretendojnë se Kievi e ka mbyllur qëllimisht tubacionin, duke përdorur incidentin si një mjet presioni politik. 

Situata ka pasur edhe pasojë konkrete financiare: Hungaria ka vonuar miratimin e një kredie të Bashkimit Evropian për Ukrainën derisa tubacioni të rihapet. Ajo gjithashtu ka propozuar të dërgojë një mision të përbashkët hetimor në Ukrainë, së bashku me Sllovakinë, për të vlerësuar gjendjen e tubacionit.

Përveç presionit nga Hungaria dhe Sllovakia, disa qeveri të tjera pro-Ukrainë brenda BE-së dhe Komisioni Evropian gjithashtu po kërkojnë qasje të menjëhershme për të vërtetuar që Ukraina po punon për rikthimin e furnizimit me naftë. 

Siç raporton FT, pesë diplomatë dhe zyrtarë të Bashkimit Europian raportojnë se gjatë vizitës së tyre në Kiev në përvjetorin e katërt të pushtimit rus, Ursula von der Leyen, presidente e Komisionit Evropian, dhe Antonio Costa, president i Këshillit Evropian, i kanë kërkuar drejtpërdrejt udhëheqjes ukrainase të lejojë ekspertët të inspektojnë tubacionin Druzhba. 

Megjithatë, kërkesa është refuzuar. Situata ka rëndësi strategjike për Evropën. Tubacioni Druzhba është një arterie kryesore e furnizimit me energji, dhe çdo vonesë apo mosaksesim i tij mund të ndikojë në çmimet e energjisë dhe në sigurinë energjetike të vendeve që varen nga nafta ruse. 

Për Ukrainën, kjo përfaqëson një sfidë të dyfishtë: të ruajë sovranitetin e saj dhe të demonstrojë bashkëpunim me partnerët evropianë, pa i lejuar Rusisë të përfitojë politikisht nga situata.