Pas rreth një muaji e gjysmë përshkallëzimi të tensioneve në Lindjen e Mesme, Shtetet e Bashkuara dhe Irani kanë arritur një marrëveshje për armëpushim të përkohshëm dyjavor, vetëm pak para afatit të vendosur nga presidenti amerikan, Donald Trump.
Marrëveshja, e cilësuar si një hap i parë drejt uljes së tensioneve, erdhi në minutat e fundit, duke shmangur përkohësisht një përplasje të mëtejshme që kishte ngritur shqetësime ndërkombëtare për pasoja të rënda humanitare dhe ekonomike.
Presidenti Trump njoftoi se armëpushimi është arritur me kushtin që Irani të rihapë Ngushticën strategjike të Hormuzit, një pikë kyçe për transportin global të naftës, përmes së cilës kalon rreth 20% e furnizimit botëror. Ai e cilësoi marrëveshjen si një “fitore të plotë”, ndërsa la të hapur mundësinë e veprimeve të mëtejshme në rast moszbatimi.
Sipas burimeve amerikane, pritet që gjatë dy javëve të ardhshme të zhvillohen negociata të drejtpërdrejta mes palëve, me gjasë në Islamabad, nën ndërmjetësimin e Pakistanit. Ndërkohë, edhe Izraeli është përfshirë në marrëveshje dhe ka pranuar të pezullojë sulmet ndaj Iranit.
Nga ana tjetër, ministri i Jashtëm i Iranit, Abbas Araghchi, deklaroi se operacionet ushtarake iraniane do të ndalen nëse ndalen sulmet ndaj vendit të tij. Ai theksoi se Teherani është i gatshëm të garantojë kalimin e sigurt në Ngushticën e Hormuzit gjatë periudhës së armëpushimit.
Megjithatë, retorika nga Teherani mbetet e ashpër. Këshilli i Lartë i Sigurisë Kombëtare i Iranit e përshkroi marrëveshjen si një “disfatë për SHBA-të”, duke paralajmëruar reagim të fortë ndaj çdo shkeljeje.
Sa i përket kushteve, të dyja palët kanë paraqitur propozime të ndryshme. SHBA-të kanë sugjeruar një plan me 15 pika që përfshin kufizime mbi programin bërthamor iranian, dorëzimin e uraniumit të pasuruar dhe ndryshime në politikën rajonale të Teheranit.
Ndërkohë, Irani ka propozuar një plan me 10 pika që përfshin heqjen e sanksioneve, tërheqjen e forcave amerikane nga rajoni dhe njohjen e të drejtës për pasurim bërthamor.
Detajet e plota të marrëveshjes mbeten ende të paqarta, ndërsa komuniteti ndërkombëtar ndjek me vëmendje zhvillimet që mund të përcaktojnë fatin e një konflikti që ka tronditur rajonin dhe tregjet globale të energjisë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
