Rezervat e naftës në vendet më të zhvilluara të botës kanë rënë në nivelin më të ulët të regjistruar në 23 vitet e fundit, sipas të dhënave të publikuara nga Administrata Amerikane e Informacionit për Energjinë (EIA).
Institucioni parashikon që rezervat globale të naftës do të tkurren me rreth 6.3 milionë fuçi në ditë gjatë tremujorit aktual, ndërsa në tremujorin e tretë pritet një rënie shtesë prej 7.66 milionë fuçish në ditë.
Sipas raportit, presioni mbi tregun energjetik është rritur ndjeshëm për shkak të kufizimeve në qarkullimin e naftës përmes Ngushticës së Hormuzit, një nga korridoret më të rëndësishme të transportit të energjisë në botë. Kjo situatë ka detyruar vendet të përdorin në mënyrë intensive rezervat tregtare dhe ato strategjike të emergjencës.
Si pasojë, rezervat e naftës në 38 vendet anëtare të Organizatës për Bashkëpunim Ekonomik dhe Zhvillim (OECD) kanë zbritur në nivelin më të ulët që nga viti 2003. Në këtë grup bëjnë pjesë ekonomitë kryesore të botës, përfshirë Shtetet e Bashkuara, Kanadanë, Japoninë, Korenë e Jugut, Francën dhe Mbretërinë e Bashkuar.
Në të njëjtën kohë, shumë vende kanë rritur varësinë nga furnizimet amerikane me naftë për të kompensuar mungesat e krijuara nga reduktimi i eksporteve të naftës së Lindjes së Mesme.
EIA bëri të ditur se eksportet neto të naftës bruto dhe produkteve të saj nga Shtetet e Bashkuara arritën një rekord prej 5.8 milionë fuçish në ditë gjatë muajit prill. Për të gjithë vitin, autoritetet amerikane presin që eksportet neto të mesatarizohen në 4.2 milionë fuçi në ditë, dukshëm më shumë krahasuar me 1.4 milionë fuçi në ditë një vit më parë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
