Tre persona kanë humbur jetën dhe të paktën pesë të tjerë janë plagosur pas shpërthimit të vullkanit aktiv Dukono në Indonezi, ku një grup prej 20 alpinistësh kishte hyrë pavarësisht ndalimit të ngjitjes.
Autoritetet konfirmuan se 15 alpinistë janë evakuuar me sukses, ndërsa ekipet e shpëtimit vijojnë operacionin për nxjerrjen e trupave të viktimave pranë majës së vullkanit.
Sipas policisë lokale, në grup ndodheshin nëntë shtetas nga Singapori dhe disa alpinistë vendas. Dy nga viktimat dyshohet të jenë shtetas singaporianë.
Kushtet në zonë mbeten shumë të rrezikshme për shkak të hirit vullkanik, shpërthimeve të vazhdueshme dhe rënies së shkëmbinjve nga krateri.
Autoritetet kishin paralajmëruar prej javësh për ndalimin e ngjitjeve në malin Dukono, i cili ndodhet në nivel të shtuar alarmi vullkanik. Megjithatë, alpinistët dyshohet se hynë në shteg pa regjistrim zyrtar për të parë nga afër kraterin aktiv.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
