Mbi 200 mijë emigrantë kanë kaluar Kanalin Anglez me varka të vogla që nga viti 2018, sipas të dhënave më të fundit të Ministrisë së Brendshme britanike. Vetëm të premten, 70 persona mbërritën në brigjet britanike, duke e çuar totalin në 200,013 kalime në nëntë vitet e fundit.
Pavarësisht premtimeve të qeverive britanike për të frenuar emigracionin e paligjshëm dhe për të goditur rrjetet e kontrabandës, numri i kalimeve është më shumë se dyfishuar gjatë viteve të fundit. Të paktën tetë emigrantë kanë humbur jetën këtë vit gjatë përpjekjeve për të kaluar Kanalin, ndërsa në vitin 2024 u regjistruan 23 viktima.
Shumica e emigrantëve që përdorin këtë rrugë vijnë nga Irani, Afganistani, Iraku, Eritrea dhe Shqipëria, ndërsa së fundmi është rritur ndjeshëm numri i mbërritjeve nga vendet afrikane si Sudani, Somalia dhe Etiopia.
Qeveria britanike thotë se ka forcuar bashkëpunimin me Francën për të ndaluar kalimet ilegale dhe rrjetet kriminale, duke deklaruar se mbi 42 mijë tentativa janë parandaluar që nga zgjedhjet e fundit. Sipas autoriteteve, rreth 95% e emigrantëve që mbërrijnë me varka kërkojnë azil në Mbretërinë e Bashkuar.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
