Fragmente raketash “Made in USA” pas sulmit fatal në shkollën fillore në Iran, nis hetimi amerikan (VIDEO)

Autoritetet iraniane kanë publikuar pamje dhe fotografi nga fragmente të raketave të kapura në vendin ku më 28 shkurt u sulmua shkolla fillore Shajareh Tayyebeh në qytetin jugor të Iranit, Minab. Përmes këtyre pamjeve, disa prej mbetjeve duket se mbajnë mbishkrimin “Made in USA” dhe emrat e kompanive të industrisë amerikane të mbrojtjes, duke rritur dyshimet se një raketë amerikane Tomahawk ishte përfshirë në sulm. 

Ngjarja më 28 shkurt shkaktoi një numër të madh viktimash, kryesisht fëmijë, ku raportimet nga burimet iraniane flasin për mbi 150 të vrarë, shumica nxënës të moshës 7-12 vjeç.

Shkolla ndodhej afër një baze ushtarake të Gardës Revolucionare Islamike, objektiv i mundshëm i bombardimeve të forcave amerikane dhe izraelite.

Analiza e fragmenteve të mbledhura dhe publikuara në media tregon se shumë pjesë mbajnë mbishkrime të qarta amerikane dhe emra kompanish amerikane që prodhojnë komponentë për raketat Tomahawk. 

Ekspertë të armëve theksojnë se kjo lloj rakete përdoret vetëm nga forcat e Shteteve të Bashkuara të Amerikës në këtë konflikt, dhe asnjëra nga palët e tjera të përfshirë nuk ka këtë tip rakete në arsenal. 

Qeveria amerikane ka pranuar se po zhvillon një hetim mbi incidentin dhe nuk ka mohuar nga ana zyrtare përfshirjen e forcave amerikane. Raporte të brendshme paraprake tregojnë se mund të ketë pasur një gabim në inteligjencë ose synim të gabuar të objektivit, ku koordinatat e dhëna për sulmin kundër një baze ushtarake afër shkollës mund të kenë qenë të pasakta. Hetimi është ende në zhvillim e sipër.

Ligjvënës amerikanë i kanë bërë thirrje administratës për sqarime të plota dhe të pavarura lidhur me këtë sulm, duke e cilësuar “të tmerrshëm” dhe duke kërkuar transparencë maksimale. Organizata për të Drejtat e Njeriut dhe aktorë ndërkombëtarë kanë kërkuar një hetim të plotë për të vlerësuar nëse ky incident përbën shkelje të ligjeve të luftës ose krim lufte.