FBI-ja i ka kthyer Meksikës një dokument të vjedhur 500-vjeçar të nënshkruar nga pushtuesi spanjoll Hernan Cortes.
Faqja e dorëshkrimit është shkruar në vitin 1527 dhe është një nga 15 faqet që mendohet se janë vjedhur nga arkivat kombëtare të Meksikës midis viteve 1985 dhe 1993, tha agjencia hetimore amerikane.
Faqja, e cila përshkruan pagesat e bëra për furnizimet për ekspeditat, u zbulua në SHBA dhe u riatdhesua të mërkurën.
Cortes ishte një eksplorues që solli fundin e perandorisë Azteke dhe ndihmoi në hapjen e rrugës për kolonizimin spanjoll. Dorëshkrimi detajon planet për udhëtimin e tij nëpër atë që do të bëhej Spanja e Re.
Në kulmin e saj, kolonia shtrihej në pjesën më të madhe të Amerikës së Veriut perëndimore dhe qendrore, si dhe në Amerikën Latine.
Dokumenti që mungonte u shkrua pasi Cortes u emërua guvernator i Spanjës së Re nga kurora spanjolle.
Arkivat kombëtare të Meksikës e kishin përfshirë dokumentin mes një koleksioni dokumentesh të nënshkruara nga Cortes, por zbuluan se mungonin 15 faqe kur u vendos në mikrofilm në vitin 1993.
Faqja e gjetur mbante një numër të shkruar me dyll që arkivistët e kishin aplikuar në vitet 1985-1986.
Qeveria meksikane kërkoi ndihmën e ekipit të krimit të artit të FBI-së për të gjetur dokumentet e humbura në vitin 2024, duke dhënë shënime se cilat faqe ishin marrë dhe si disa faqe ishin grisur.
FBI tha se kërkimet me burim të hapur zbuluan se dokumenti ndodhej në SHBA. Agjencia nuk zbuloi saktësisht se ku u gjet faqja e dorëshkrimit ose kujt i përkiste kur u sekuestrua.
Askush nuk do të përballet me ndjekje penale për vjedhjen pasi faqja kishte “ndërruar pronarë disa herë” që kur u vodh, sipas agjentes speciale Jessica Dittmer të ekipit të krimit të artit të FBI-së.
“Dokumenti jep shumë informacion sa i përket planifikimit dhe përgatitjes për territorin e paeksploruar në atë kohë”, tha ajo, duke përshkruar pagesën e pesove të arit për shpenzimet në përgatitje për zbulimin e tokave të erëzave.
Të ashtuquajturat “tokat e erëzave” ishin zona të Azisë lindore dhe jugore. Evropianët kërkuan të gjenin një rrugë më të shpejtë tregtare me këto zona duke lundruar në perëndim, por duke vepruar kështu zbarkuan në Amerikë.
Cortes vazhdoi të eksploronte Meksikën veriperëndimore dhe gadishullin Baja California.
Riatdhesimi i dokumentit vjen në një kohë tensionesh politike midis Meksikës dhe SHBA-së për shkak të tarifave të vendosura nga administrata Trump dhe migracionit të paligjshëm përtej kufirit SHBA-Meksikë.
Por FBI thotë se, si një nga konsumatorët më të mëdhenj të antikiteteve, SHBA-të kishin përgjegjësinë për të luftuar trafikimin e artefakteve.
FBI-ja tha se ishte e vendosur të gjente dhe riatdhesonte faqet e tjera që ende mungonin nga koleksioni.
Një dokument tjetër i nënshkruar nga Cortes u kthye në Meksikë nga FBI në vitin 2023.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
