Meta u përball me një reagim të fortë negativ nga investitorët pasi aksionet e kompanisë ranë deri në 11%, pas publikimit të rezultateve financiare të tremujorit prill-qershor. Edhe pse të ardhurat u rritën me 28%, duke arritur në 61 miliardë dollarë, fitimi neto ra me 14%, në 6 miliardë dollarë.
Shkaku kryesor i rënies ishte vendimi i kompanisë për të rritur edhe më tej investimet në inteligjencën artificiale. Meta njoftoi se këtë vit do të shpenzojë nga 130 deri në 145 miliardë dollarë, mbi parashikimin e mëparshëm prej 125 miliardë dollarësh, kryesisht për zhvillimin e infrastrukturës dhe teknologjive të IA-së.
Drejtori ekzekutiv Mark Zuckerberg mbrojti strategjinë, duke deklaruar se investimet në inteligjencën artificiale po përmirësojnë të gjitha segmentet kryesore të biznesit dhe se kompania synon të nisë shitjen e modeleve dhe shërbimeve të saj të IA-së për bizneset.
Sipas tij, agjentët inteligjentë që mund të punojnë në mënyrë autonome "24 orë në ditë, 7 ditë në javë" do të jenë produkti i radhës i madh i Meta-s.
Megjithatë, analistët mbeten skeptikë. Fluksi i lirë i parasë i kompanisë zbriti në vetëm 784 milionë dollarë, niveli më i ulët në të paktën pesë vitet e fundit.
Ekspertët paralajmërojnë se Meta po investon miliarda përpara se të ketë prova të qarta se këto projekte do të sjellin fitime, duke e krahasuar situatën me investimet e kushtueshme në metaverse.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
