Khamenei përgatit plan emergjence në rast të vrasjes së tij

Lideri Suprem i Iranit, Ajatollah Ali Khamenei, u ka dhënë udhëzime ndihmësve të tij të lartë se si të sillen në rast të vrasjes së tij në sulme të mundshme nga Shtetet e Bashkuara të Amerikës ose Izraeli. 

Lajmi raportohet nga New York Times, duke cituar ekzistencën e planeve të emergjencës që përfshijnë urdhra shumënivelëshe të trashëgimisë dhe zinxhirë komandues emergjent.

Në kulmin e protestave mbarëkombëtare muajin e kaluar dhe në një sfond të kërcënimeve në rritje për ndërhyrje ushtarake nga Shtetet e Bashkuara, Khamenei e ngriti besnikun Ali Larijani, një ish-komandant të Gardës Revolucionare dhe politikan veteran, në një rol qeveritar qendror , duke e vendosur atë në mënyrë efektive në krye të punëve shtetërore.

Duke cituar intervista me zyrtarë të lartë iranianë, anëtarë të Gardës Revolucionare dhe ish-diplomatë, New York Times raporton se Larijani që atëherë ka mbikëqyrur shtypjen e protestave, ka zhvilluar diplomaci delikate bërthamore me Uashingtonin dhe ka koordinuar bashkëpunimin me aleatët, përfshirë Rusinë, Katarin dhe Omanin. 

Ai thuhet gjithashtu se po udhëheq planifikimin e luftës, ndërsa Irani përgatitet për sulme të mundshme të SHBA-së.

Khamenei do të emëronte edhe disa nivele pasardhësish në pozicione kyçe ushtarake dhe politike, duke ia deleguar autoritetin e vendimmarrjes një rrethi të ngushtë në rast të ndërprerjes së komunikimeve ose vrasjes së tij.

Larijani nuk shihet si një pasardhës i mundshëm i Udhëheqësit Suprem, ai nuk është një klerik i lartë shiit, megjithatë ai paraqitet si një nga menaxherët më të besuar të krizave të Khameneit.

Udhëheqësi Suprem i Iranit ka përdorur një ton sfidues ndaj Shteteve të Bashkuara të Amerikës dhe Izraelit, duke paralajmëruar se çdo sulm do të përballet me një përgjigje vendimtare.