Islanda nuk do të marrë pjesë në Festivalin e Këngës Eurovision në vitin 2026, njoftoi transmetuesi shtetëror i vendit RUV, pasi organi organizator, Unioni Evropian i Transmetimeve, dha dritën jeshile javën e kaluar për pjesëmarrjen e Izraelit.
Vendimi për të lejuar Izraelin të marrë pjesë në Festivalin e Këngës në Eurovision që do të mbahet në Vjenë në maj, kishte bërë që Spanja, Holanda, Irlanda dhe Sllovenia të tërhiqeshin në shenjë proteste, duke përmendur luftën e Izraelit në Rripin e Gazës.
“Nga debati publik në këtë vend dhe reagimi ndaj vendimit të EBU-së javën e kaluar është e qartë se nuk do të ketë as gëzim dhe as paqe në lidhje me pjesëmarrjen e RUV”, tha në një deklaratë drejtori i përgjithshëm i rrjetit, Stefan Eriksson.
Islanda ishte ndër vendet që kishin kërkuar votim javën e kaluar mbi pjesëmarrjen e Izraelit. Megjithatë, EBU vendosi të mos mbajë votim mbi pjesëmarrjen e Izraelit, duke thënë në vend të kësaj se po zbatonte rregulla të reja për të dekurajuar qeveritë nga ndikimi në konkurs.
Islanda nuk e ka fituar kurrë konkursin e muzikës, por u rendit e dyta në vitet 1999 dhe 2009. Konkursi i Këngës në Eurovision daton që nga viti 1956 dhe ndiqet nga rreth 160 milionë shikues, sipas EBU-së.
Holanda, Spanja, Sllovenia, Irlanda dhe Islanda janë vendet që kanë njoftuar tërheqjen e tyre nga konkursi i këngës për shkak të pjesëmarrjes së Izraelit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
