Lideri i partisë Reform UK, Nigel Farage, njoftoi këtë të martë se do të japë dorëheqjen nga mandati i deputetit, duke hapur rrugën për mbajtjen e një zgjedhjeje të pjesshme në zonën e tij elektorale, ku do të kandidojë sërish për t’u rizgjedhur.
Partia e tij, prej më shumë se një viti kryeson në shumicën e sondazheve kombëtare dhe ka shënuar fitore në zgjedhjet lokale, duke sfiduar dominimin historik të Partisë Laburiste dhe asaj Konservatore.
Megjithatë, javët e fundit Farage është përballur me presion të madh pas zbulimeve se kishte pranuar një donacion prej 5 milionë paundësh nga një investitor miliarder i kriptomonedhave, pa e deklaruar atë sipas rregullave parlamentare.
Aktualisht, ai është nën hetim nga organi parlamentar përgjegjës për mbikëqyrjen e standardeve të sjelljes së deputetëve lidhur me këtë donacion, ndërsa është referuar edhe tek autoritetet rregullatore pas raportimeve për donacione të tjera.
Zbulimet mbi financat e tij kanë shtuar vëmendjen ndaj pasurisë dhe burimeve të financimit të liderit të Reform UK.
Ditët e fundit, Farage është ankuar edhe për, sipas tij, ngacmimet ndaj familjes së tij nga gazetarët dhe ndërhyrjen e medias në jetën private.
Nëse shpallet fajtor për shkelje serioze të rregullave parlamentare mbi deklarimin e pasurisë, Farage mund të pezullohet nga Dhoma e Komunave.
Një pezullim prej 10 ditësh ose më shumë mund të çojë në nisjen e një peticioni për shkarkimin e tij, duke detyruar zhvillimin e një zgjedhjeje të pjesshme në zonën që ai përfaqëson.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
