Mbi 3 mijë raste me ciklosporë në SHBA, dyshohet se burimi është sallata jeshile

Më shumë se 3,000 persona janë prekur nga një shpërthim i ciklosporiazës në shtetet amerikane të Michiganit dhe Ohajos, ndërsa autoritetet shëndetësore po hetojnë burimin e infeksionit. 

Dyshimet e para bien mbi sallatën jeshile, megjithëse zyrtarët theksojnë se ende nuk është identifikuar asnjë produkt, kultivues apo furnizues specifik.

Në Michigan janë konfirmuar 2,640 raste dhe 44 shtrime në spital, ndërsa Ohio ka raportuar 361 raste, me të paktën 46 persona të hospitalizuar. Sipas CDC-së, raste janë raportuar në 31 shtete, por ende nuk është konfirmuar nëse të gjitha lidhen me të njëjtin shpërthim.

Ciklosporiaza është një infeksion i zorrëve i shkaktuar nga paraziti Cyclospora cayetanensis, që transmetohet kryesisht përmes ushqimeve ose ujit të kontaminuar. 

Simptomat përfshijnë diarre të rëndë, dhimbje barku dhe fryrje, ndërsa diagnoza dhe gjurmimi i burimit janë të vështira, pasi simptomat shfaqen pas rreth një jave dhe pacientët duhet të kujtojnë ushqimet e konsumuara disa javë më parë.

Autoritetet amerikane kanë rekomanduar larjen e kujdesshme të frutave dhe perimeve, blerjen e kokave të plota të sallatës në vend të produkteve të lara paraprakisht dhe gatimin e ushqimeve kur është e mundur, deri në identifikimin e burimit të shpërthimit.