U vodh nga nazistët, gjendet në Argjentinë piktura e zhdukur

Zyrtarët argjentinas njoftuan të mërkurën se kishin rikuperuar një pikturë të vjedhur dekada më parë nga nazistët, pas ditësh interesi ndërkombëtar dhe kontrollesh për të gjetur veprën e artit pasi ajo u pa aksidentalisht në një reklamë pasurish të paluajtshme.

Portreti i Konteshës Colleoni, nga artisti italian Giuseppe Ghislanti, u ekspozua në një dhomë në zyrën e prokurorit federal në qytetin bregdetar të Mar del Plata, ku zyrtarët u thanë gazetarëve se së shpejti do të zbulonin më shumë detaje rreth rikuperimit të pikturës.

Kryevepra italiane është përfshirë në një bazë të dhënash të veprave të artit të vjedhura nga nazistët dhe ka qenë e zhdukur për 80 vjet.

Një gjykatës në Mar de Plata i tha Reuters se Patricia Kajien, vajza e një ish-zyrtari nazist, dhe bashkëshorti i saj ua dorëzuan pikturën prokurorëve nëpërmjet avokatit të tyre.

“Ekspertët e artit që monitorojnë rastin do të jenë përgjegjës për të siguruar ruajtjen e veprave të artit”, tha zyrtari.

Autoritetet argjentinase bastisën një shtëpi në Mar del Plata javën e kaluar pasi piktura u shfaq e varur në mur në një foto në një listë pronash, por ata nuk ishin në gjendje ta gjenin menjëherë atë.

Rasti mori vëmendjen e publikut pasi gazeta holandeze Algemeen Dagblad raportoi për herë të parë se shtëpia në listën e pronave i përkiste Patricia Kadgin, vajzës së Friedrich Kadgin, një zyrtari të lartë në qeverinë e Adolf Hitlerit, i cili u transferua në Argjentinë nga Gjermania pas Luftës së Dytë Botërore. Ajo vdiq në vitin 1979.

Një gjykatë federale urdhëroi Patricia Kadgin dhe bashkëshortin e saj të qëndrojnë në arrest shtëpie për 72 orë duke filluar nga e hëna. 

Një zyrtar i gjykatës i tha Reuters se ata do të merren në pyetje me akuzën e pengimit të hetimit për rikuperimin e pikturës.

Portreti i Konteshës Colleoni ishte midis më shumë se 1000 veprave të artit të vjedhura nga nazistët nga tregtari i artit me bazë në Amsterdam, Jacques Goodsticker, i cili vdiq në vitin 1940.