Pas një skandali që lidhet me abuzimin e fondeve të Bashkimit Evropian, tre ministra të qeverisë greke të Kyriakos Mitsotakis kanë dhënë dorëheqjen, duke detyruar një riformatim të kabinetit qeveritar.
Bëhet fjalë për ministrin e Zhvillimit Rural dhe Ushqimit, Kostas Tsiaras, ministrin e Krizës Klimatike dhe Mbrojtjes Civile, Giannis Kefalogiannis, si dhe zv.ministrin e Shëndetësisë, Dimitris Vartzopoulos. Ata dyshohet se janë të përfshirë në një çështje që lidhet me përfitimin e paligjshëm të subvencioneve bujqësore në vitin 2021.
Sipas hetimeve të nisura nga Zyra e Prokurorit Evropian, fondet janë marrë përmes deklarimeve të rreme, manipulimeve elektronike dhe ndërhyrjeve për të favorizuar aplikime të caktuara.
Dy ditë më parë, Prokuroria Evropiane i dërgoi Parlamentit grek një dosje të re, duke kërkuar heqjen e imunitetit për 11 deputetë të Demokracia e Re, mes tyre edhe ish-zyrtarë të lartë të bujqësisë.
Ndërkohë, dorëheqjen e ka dhënë edhe sekretari i përgjithshëm i kësaj partie, Kostas Skrekas.
Për të vijuar hetimet, Parlamenti duhet të miratojë kërkesën për heqjen e imunitetit, një hap që pritet të ndodhë në ditët në vijim.
Në kuadër të riformatimit të kabinetit, në postin e ministrit të Zhvillimit Agrar është emëruar Margaritis Schinas, ndërsa ministri i ri i Mbrojtjes Civile është Evangelos Tournas. Po ashtu, Makarios Lazaridis është emëruar zv.ministër i Zhvillimit Agrar.
Analistët vlerësojnë se ky veprim i kryeministrit Mitsotakis synon të japë një mesazh të qartë: qeveria nuk do të mbrojë asnjë zyrtar që dyshohet për përfshirje në raste korrupsioni.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
