Përmbytje të fuqishme kanë goditur sërish Nepalin duke shkatërruar shtëpi, ura dhe pjesë të infrastrukturës. Fatkeqësia ndodhi në distriktin Gorkha, një zonë malore rreth 100 kilometra në perëndim të kryeqytetit Katmandu, pasi një rrëshqitje dheu bllokoi lumin Budhi Gandaki.
Uji u grumbullua pas pengesës dhe, kur ajo u ça, vërshoi me forcë drejt zonave të banuara. Sipas raportimeve të autoriteteve, rreth 36 banesa janë shkatërruar, ndërsa katër ura dhe një kantier ku po ndërtohej një hidrocentral janë goditur nga përmbytjet.
Pesë persona rezultojnë të zhdukur. Ekipet e shpëtimit kanë nxjerrë nga rreziku 49 persona, mes tyre edhe një shtetas të huaj. Pas vërshimit, autoritetet u kanë kërkuar banorëve që jetojnë përgjatë lumit dhe në zonat më poshtë rrjedhës të largohen menjëherë drejt vendeve më të larta, nga frika se uji mund të përmbysë edhe zona të tjera.
Në operacionet e kërkim-shpëtimit janë angazhuar forcat e ushtrisë dhe policisë. Përmbytjet e fundit vijnë pas katastrofës së rëndë të 26 gushtit, kur një vërshim masiv në zonën kufitare mes Nepalit dhe Tibetit shkaktoi mijëra viktima dhe të zhdukur.
Sipas bilancit të autoriteteve nepaleze, të raportuar nga Reuters, të paktën 1.455 persona kanë humbur jetën. Katastrofa e mëparshme shkatërroi banesa, rrugë, ura dhe objekte të prodhimit të energjisë elektrike.
Ngjarja e re në distriktin Gorkha rikthen shqetësimin për rrezikun e përmbytjeve të menjëhershme në zonat malore të vendit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
