1200 faqe, fryt i dy viteve e gjysmë pune tepër sekrete është “Plani Operacional i Gjermanisë”, i hartuar nga ushtria gjermane për t’u përgatitur për një luftë të mundshme me Rusinë.
Detajet e “Oplan Deu”, siç quhet në zhargonin ushtarak, u zbuluan nga Wall Street Journal.
Sipas gazetës amerikane, të gjitha detajet u shkruan në letër nga dhjetëra zyrtarë të lartë që kanë punuar në fshehtësi të plotë në dhomat e kazermave Julius Leber që nga shkurti i vitit 2022, kur Rusia filloi ndërhyrjen ushtarake në Ukrainë.
Plani parashikon mobilizimin e 800.000 ushtarëve gjermanë, amerikanë dhe të NATO-s drejt vijës lindore të frontit. Ai përfshin harta të porteve, lumenjve, hekurudhave dhe rrugëve që do të përdorin, si dhe detaje mbi furnizimet dhe mbrojtjen përgjatë rrugës përmes territorit gjerman.
Për më tepër, gjeografia sugjeron që Gjermania është në një pozicion strategjik për një konflikt me Rusinë. Gjermania pret që Rusia të sulmojë NATO-n në vitin 2029.
Por incidentet e shumta të sabotimit dhe ndërhyrjes në hapësirën ajrore në Evropë, shumë prej të cilave inteligjenca perëndimore ia ka atribuuar Moskës, sugjerojnë se ajo mund të jetë duke u përgatitur që kjo të ndodhë edhe më shpejt.
Një armëpushim i afërt në Ukrainë mund të jetë paradoksalisht një lajm i keq për pjesën tjetër të Evropës, pasi Moska do të çlironte përsëri forcat e saj për një front tjetër dhe do të lëvizte kundër NATO-s.
Prandaj nevoja për t’u përgatitur, me shpresën jo vetëm për të sprapsur ofensivën nëse është e nevojshme, por mbi të gjitha për ta parandaluar atë. Duke ditur përgatitjet që po bëhen në anën e NATO-s, Rusia mund të hezitojë të sulmojë duke pasur parasysh rrezikun e humbjes.
Ushtrimet kanë filluar tashmë. Kompania “Rheinmetall”, e cila kohët e fundit fitoi një kontratë prej 260 milionë eurosh nga Ministria Gjermane e Mbrojtjes, ngriti një kamp për 500 ushtarë në kohë rekord, të kompletuar me konvikte, 48 kabina dushi, pesë stacione karburanti, një kuzhinë fushore, mbikëqyrje me dronë dhe roje të armatosura të mbrojtura nga ndikimi rus dhe kinez.
U deshën 14 ditë për ta montuar dhe shtatë për ta çmontuar. Ushtrimi nxori në pah gjithashtu çështje kritike që duheshin adresuar. Për shembull, kampi i improvizuar nuk ishte tërësisht në të njëjtin terren dhe për këtë arsye paraqiste vështirësi logjistike. Që nga fundi i Luftës së Ftohtë, strukturat me përdorim të dyfishtë, siç janë fushat e uljes emergjente, janë çmontuar kudo.
Jo vetëm kaq. Sipas hartuesve të planit, ka pengesa edhe më të rrezikshme burokratike: rregullat e prokurimit, rregullat e mbrojtjes së të dhënave dhe rregullore të tjera të lindura nga një kohë paqeje.
Për të ecur përpara, duhet hequr dorë nga arritjet që mendohej se do të konsolidoheshin, siç është heqja e shërbimit të detyrueshëm ushtarak dhe Berlini po punon për këtë.
Hapi i parë ishte rivendosja e rekrutimit ushtarak, megjithëse për momentin nuk është i detyrueshëm. Në afat shkurtër, përmirësimi i qëndrueshmërisë do të thotë shfrytëzimi maksimal i rrjeteve ekzistuese rrugore dhe hekurudhore, të cilat kërkojnë modernizim masiv.
Në afat të gjatë, Berlini synon të shpenzojë 166 miliardë euro për infrastrukturë deri në vitin 2029, përfshirë mbi 100 miliardë euro për hekurudhat e lëna pas dore prej kohësh, dhe t’i japë përparësi infrastrukturës me përdorim të dyfishtë.
Dhe investime masive në pajisje ushtarake pas viteve të mosinvestimit në sektor, një rrugë e ndjekur tashmë pas pushtimit të Ukrainës kur kancelari gjerman Olaf Scholz njoftoi një fond prej 100 miliardë eurosh, të cilin ai e quajti një “ndryshim epokal”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
