Gazetari Arsen Rusta ka zbuluar për MCN Live detaje nga hakerimi i të dhënave të tre prokurorëve të SPAK-ut, Behar Dibrës, Enkeleida Millonait dhe Elida Kaçkinit.

Disa prej materialeve të hakeruara përbëjnë sekret hetimor dhe lidhen me fashikuj apo deklarime të dosjeve, ku përfshihen politikanë, ish-ministra, mes të cilave edhe çështja e inceneratorit.

Të identifikuar me prova janë dy shtetas Rrokaj dhe Gjonaj që janë arrestuar, u është sekuestruar telefoni dhe po hetohen. Ata i kishin shpërndarë materialet në një rreth shoqëror, për të mbërritur më pas në celularin e Agim Ismaili, ish-kreu i Burgjeve, Dritan Palnikaj, që ka qenë më herët sekretar i MAS. 

“Jemi në javën e dytë të një alarmi të kuq në SPAK. Sistemet e teknologjisë dhe informacionet kanë pësuar një sulm kibernetik.  Jemi në një ndërhyrje lokale, e cila ka dy emra si përgjegjës të dyshuar: Ardit Rrokaj, ish-zyrtar i IKMT, si dhe Zambak Gjonaj, ish-zyrtar i drejtorisë së burgjeve. 

Afro 15 ditë më parë në 1:00 të mëngjesit, sistemi i alarmit ka dhënë një alarm të kuq duke alarmuar SPAK. Në SPAK janë paraqitur drejtuesit e institucionit dhe shërbimet e sigurisë dhe teknologjisë së informacionit janë shkëputur serverat nga rrjeti dhe është bërë një bllokim i ndërhyrjes.

Edhe pse ka patur një parandalim veprimet ishin bërë. MCN Live ka mundur të mësojë se nga kjo ndërhyrje e paligjshme janë prekur email-et e tre prokurorëve Behar Dibrës, Elida Kaçkinit dhe Enkeleida Millonai. 

Ndër materialet e marra kërkesa për gjykim, akt ekspertimi, fashikuj hetimor, dhe deklarime të shtetasve të ndryshëm që lidhen me mjaft dosje përfshi krimin e organizuar, përfshi hetimin ndaj zyrtarëve të lartë, politikanëve, ish-ministrave, por edhe dosjen e inceneratorit. 

Disa prej akteve konsiderohen sekret hetimor, ndërsa pjesa më e madhe e materiale lidhen me çështje që janë dërguar në gjyq, dhe janë deri diku publike. Është bërë një ndryshim i pajisjeve, i kodeve të sigurisë, dhe shtim i sigurisë me asistencën e partnerëve ndërkombëtarë.  

Të identifikuar me prova janë dy shtetas Rrokaj dhe Gjonaj që janë arrestuar dhe po hetohen, si dhe janë sekuestruar telefonat e tyre celular. Rrokaj i ka marrë materialet në mënyrë të paligjshme, ia ka dërguar Gjonajt, të njohurit të tij. Më pas i kanë shpërndarë në rreth shoqëror kanë mbërritur disa materiale në celularin e Agim Ismaili, ish-kreu i Burgjeve, Dritan Palnikaj, që ka qenë më herët sekretar i përgjithshëm në Ministrinë e Arsimit.

Kjo është arsyeja pse një javë më parë ka qenë për 45 minuta në SPAK. Ka pretendime se disa prej materialeve të konsideruara sekret kanë shkuar edhe në media, dhe ka një urdhër për të mos u publikuar. Një pjesë e materialeve kanë përfunduar në celularët e disa anëtarëve të Parlamentit. 

A ka apo jo një person të brendshëm që ka përgjegjësi penale? SPAK shprehet se hetimi është i hapur dhe po ndiqet nga prokurori Bledar Maksuti”.