Aktorja e njohur Margarita Xhepa është ndarë nga jeta mëngjesin e sotëm, një ditë pasi festoi 91-vjetorin e saj të lindjes.

Aktorja u lind më 2 prill të vitit 1934, në qytetin e Lushnjës, ku nisi edhe hapat e parë drejt karrierës.

E njohur si një nga zonjat e mëdha të teatrit dhe filmit shqiptar ajo ka skalitur memorien e publikut shqiptar me role brilante që prej fillimit të saj, në vitet '60-të dhe deri më tani.

Nga viti 1950 u aktivizua si artiste në Teatrin Popullor, sot Teatri Kombëtar dhe njëkohësisht studioi në Liceun Artistik, dega e Dramës.

Në rolet nga dramaturgjia botërore spikasin Klea tek Dhelpra dhe rrushtë (Figereido), Lena tek Xhaxha Vanja (Çehov), Ledi Milford tek Luiza Miler (Shiler), Zonja Berling tek Vizita e inspektorit (Pristli), Zonja Lomen tek Vdekja e një komisioneri (A. Miller), Ana Andrejevna tek Revizori (Gogol), Marsela tek Qeni i kopshtarit (De Vega), Mashenka tek Mashenka (Afigenov), Shejla tek Morali i zonjës Dulska (Zapolska), apo Dado tek Elektra e Sofokliut, nën drejtimin e regjisorit grek Dhimitri Mavriqis, në Teatrin Kombëtar të Greqisë në Athinë.

Veç roleve në teatër, ka realizuar edhe 32 role në kinematografi, “Gjurmët”, “Dimri i fundit”, “Tokë e përgjakur”, “Një djalë edhe një vajzë”, “Apasionata”, “Gjeneral gramafoni”, “Rrethi i kujtesës” dhe “Vitet e pritjes”, “Dora e ngrohtë”, “Gurët e shtëpisë sime”, “Pranvera s’erdhi vetëm”, “Koncert në vitin 1936”, ‘I dashur armik”.

Në vitin 1997, interpretoi në filmin grek “Mirupafshim”. Filmi u vlerësua me Çmimin e Madh në Festivalin Ndërkombëtar të Filmit Mesdhetar në Selanik, ndërsa Margarita Xhepa, Çmimin e Nderit.