Pedagogu Mentor Beqa tha që marrëveshja Serbi-Hungari vjen si pasojë e vakumit të krijuar nga tërheqja amerikane. Duke folur në emisionin “Zonë e Lirë” ai tha që kjo marrëveshje i shërben më shumë Vuçiçit se sa Orbanit. Megjithatë ai ngriti dyshime se sa kjo aleancë mund t’i rezistojë kohës, pasi Orban mund të mos jetë më kryeministër pas zgjedhjeve të ardhshme. 

"Nuk besoj se tremb njeri marrëveshja Serbi-Hungari. Tërheqja amerikane krijon një lloj vakumi në Ballkan. Vakumi ka nxitur palët të shikojnë alternativa të ndryshme.

Krijimi i mikro-mekanizmave të sigurisë duket si i takon të ardhmes. Janë si mekanizma përplotësues të NATO-s, jo alternativa ndaj NATO-s.

Në rastin e marrëveshjes mes Hungarisë dhe Serbisë kemi të bëjmë me problem fondamental, sepse palët janë në pozita të ndryshme, Hungaria në NATO, dhe Serbia neutral në pikëpamjen ushtarake. Kjo aleancë mbështetet më shumë te marrëdhëniet e ngushta Vuçiç-Orban dhe s’e di sa do t’i rezistojë kohës, nëse Orban s’do jetë më kryeministër vitin e ardhshëm.

Unë besoj se kjo i shërben më shumë Vuçiçit se sa Orbanit, sepse Vuçiç është në situatë politike të vështirë brenda vendit. Orban është një personalitet i madh politik, nuk krahasohet me Vuçiçin.

Karrierën politike Orbanit po ia shkatërron Trump-i, pasi ishte shndërruar në yllin konservator. Tani që artikulimin e konservatorizmit e ka marrë Trump, Orban del liliputi që është, sepse është përfaqësues i një vendi të parëndësishëm”.