Dikur një zonë që frekuentohej vetëm nga udhëheqësit, blloku i vilave qeveritare Durrës, është kthyer në kantier ndërtimi. Pjesa më e madhe e ndërtimeve që po kryen janë vila luksoze. E gjithë zona mbrohet nga punonjësit e Gardës, të cilët thonë se ruajnë ato pak vila që kanë mbetur shtetërore. Nëse prezantohesh si punëtor ndërtimi në një nga vilat brenda traut, të lejohet menjëherë hyrja. Përmes kamerave të fshehta Xhadat arritën të hyjnë në oborrin e vilës së Vangjush Dakos, fakt i cili pranohet nga punonjësi brenda rrethimit të vilës së tij.

Xhadat: Çfarë vilë është kjo?

Punonjësi i Vilës së Vangjush Dakos: E Vangjushit.

Xhadat: I kujt Vangjush o vëlla?

Punonjësi i Vilës së Vangjush Dakos: E Vangjush Dakos.

Xhadat: Aha... Këtë këtu e ka shoku Vangjushit.

Xhadat: Shokut Vangjushit, ha-ha-ha, i dihet pronari që tani këtyre ëë?

Xhadat: Uee, po si ka mundësi, sa të bukura i kanë bërë o vlla. Fantastike fare. Kush është ky shoku i Vangjushit re? Si nuk gjetëm edhe ne një shok si puna e këtij?

Punonjësi i Vilës së Vangjush Dakos: Mund të jetë dhe e Emirianës, merret vesh.

Xhadat: Emiriana, kush është kjo.

Punonjësi i Vilës së Vangjush Dakos: Emiriana Sako, ajo e bashkisë.

Një nga vilat brenda bllokut qeveritar në Durrës, ka dalë në shitje. Agjencia imobilare ka bërë këtë njoftim: 
Shitet vilë unike brenda bllokut qeveritar Durrës. Kjo vilë autentike, e ndërtuar në vitin 1927, është një thesar arkitektonik me një histori të pasur, ku kanë jetuar disa nga personalitetet më të njohura të kohës. Ajo ndodhet në vijën e parë të bregdetit, brenda një blloku qeveritar, duke ofruar një pamje magjepsëse. Në takimin me agjentin imobilar Xhadat mësuan dhe detaje.

Xhadat: Kjo thotë 500 metra katrorë...

Agjenti imobilar: Ajo është 500 metra katrorë ndërtesë, ka dhe 500 metra tokë rreth e qark, ka dhe 500 metra të tjera tokë përpara, që e ka në përdorim.

Xhadat: Tani.... pyetja është, kjo a ka hipotekë?

Agjenti imobilar: Po.

Xhadat: Ok.

Xhadat: Aty po ndërtohen vila të tjera, që mund të jenë më të mira, më të reja? 

Agjenti imobilar: Ai është bllok qeveritar, nuk jepen leje ndërtimi, aty mund të ndërtosh tek njolla e saj ekzistuese, por nuk lejohen ndërtime të tjera për momentin.

Agjenti imobilar: Është e ndaluar nga shteti, menaxhohet si kompleks nga Ministria e Mbrojtjes.

Agjenti imobilar: Po pati buxhet ai duhet ta blejë bashkë me tokën.

Xhadat: Që i bie gjithsej sa është?

Agjenti imobilar: Së bashku me tokën shkon ke 2.3-shi. Ke 2.3 milion euro. Xhadat kërkuan informacion nga  Drejtoria e Shërbimeve Qeveritare në lidhje me Bllokun e Vilave Qeveritare në Durrës, por deri më tani nuk kanë marrë asnjë përgjigje se sa nga këto vila kanë mbetur shtetërore dhe sa kanë përfunduar në duart e privatëve, që duket se kanë lidhje të ngushta me pushtetin.