Analisti Andi Bushati mendon që do jetë shumë e vështirë për ish-ministren Olta Xhaçka për të vijuar karrierën politike, por jo për shkak të drejtësisë, por për shkak të luftës në listat e hapura. Duke folur në edicionin e lajmeve në MCN TV Bushati tha që deklaratat e OSBE-ODIHR mbi zgjedhjet në Shqipëri janë bërë qesharake, duke theksuar edhe njëherë se sipas tij rezultati është i paracaktuar. 

Lidhur me hetimet për Olta Xhaçkën dhe karrierën e saj politike brenda PS-së, ai thotë:

“Mendoj që jo më tepër për arsyet e drejtësisë, por me mënyrën si është bërë beteja me listat e hapura,  znj.Xhaçka do ta ketë shumë vështirë vijimësinë e karrierës politike, dhe kjo s’ka lidhje me aferën. Nga gara s’besoj se do tërhiqet, por garën e ka pothuajse të pamundur, si shumë ish-ministra të tjerë socialistë. Gara do jetë e vështirë për gjithë ata që Rama i hodhi për të ngrënë njëri-tjetrin”.

I pyetur mbi deklaratat e OSBE-ODIHR mbi zgjedhjet Bushati shprehet:

“Edhe shqiptari më budalla është shumë më i zgjuar se sa deklaratat e ODIHR-it që janë bërë qesharake në këtë vend. Unë hyj te ata njerëz që jam i bindur që në Shqipëri s’ka zgjedhje, që është i sigurt mandati i 4-ët për Ramën. Unë jam i sigurt që loja është mbyllur ende pa filluar. Kur të lexoni raportin e OSBE-ODIHR në zgjedhjet e ardhshme, do jetë që ka pasur hapa përpara dhe ka edhe vërejtje që duhen rregulluar në zgjedhjet e ardhshme, ky është refren qesharak që s’i vlen më askujt”.