Avokati Përparim Çaça tha në “Mcn Informacion” tha se dekreti për kampet e refugjatëve në Gjadër nuk mund të ndryshonte në mënyrë unilaterale nga Italia, pa negociuar me qeverinë shqiptare. 

Sipas tij kampi i Gjadrit është dëshmi e dështimit të BE-së në politikat e emigracionit, dhe poshtërim në mënyrën se si trajtohet territori i Shqipërisë, duke u quajtur "vend i tretë". 

Ai paralajmëroi se tanimë kampet do të kthehen në burgje, ku emigrantët do të presin me muaj në pritje të dëbimit. 

"Deri tani sipas protokollit të nënshkruar ishte vetëm për 28 ditë, ose një muaj, vetëm për azilkëkruesit, ndërsa tani do ketë një funksion tjetër, për ata që dëbohen dhe afati mund të shkojë 18 muaj dhe një vit e gjysmë. Duke qenë se kemi të bëjmë me një marrëveshje dy palëshe minimalisht ky dekret që prek kampin e Gjadrin duhet të ishte negociuar edhe me qeverinë shqiptare. Nuk mundesh të ndryshosh destinacionin. Madje po kërkohet që në të ardhmen një kamp si Gjadri mund të jetë nesër një burg për shqiptarët e dënuar në Itali. Këto ndryshime unilaterale prekin protokollin e ratifikuar në Parlament. Ka një ndryshim thelbësor në marrëveshje, që duhet të ishte negociuar minimalisht me palën shqiptare. Meloni e ka bastin e vet këtë lloj modeli, madje e trumbeton si gjë të madhe, si shpikjen e saj. Kampi i Gjadrit është dëshmi e gjallë që BE ka dështuar në politikat e emigracionit por është edhe një poshtërim si mund të trajtohet territori i një vendi i tjetër. Na quajnë vendi i tretë! Kur të kemi konflikt real në Gjykatën Europiane do t’i jepet një zgjidhje përfundimtare."