Banorët e Tragjasit janë përplasur me policinë, ndërsa protestojnë kundër marrjes së ujit që sipas tyre do përdoret nga resortet e Palasës.

Anëtari i PD në Këshillin Bashkiak të Vlorës Atird Hoxha në një lidhje me skype për edicionin e lajmeve në MCN TV tha që devijimi i burimit sjell një katastrofë për fshatin e Tragjasit, Radhimës dhe bizneset.

Ai thekson që ndonëse banorëve u ishte premtuar konsultë publike lidhur me projektin, ndërhyrja është kryer në mënyrë të befasishme.

Sipas tij qeveria dhe bashkia po u shërben klientëve që po zhvillojnë resorte. Ndër të tjera ai vë në dukje se protesta është përkrahur edhe nga disa këshilltarë socialistë, jashtë kamerave. 

“Në orët e para të mëngjesit forca të shumta të policisë kanë rrethuar gjithë zonën e fshatit Tragjas, ku ndodhet edhe burimi, që po tentohet të devijohet, duke rrethuar gjithë zonën, dhe qytetarët mos kenë akses për të dhënë mendimin e tyre. Banorët kanë bërë protestat e tyre, sa i përket kësaj tentative për të grabitur ujin e pijshëm. Kemi pasur mbështetje për banorët.

Ne jemi të mendimit se me devijimin e rrjedhës së vendburimit, kjo zonë, por gjithë krahina, do ketë pasoja të jashtëzakonshme, pasi vendburimi që qeveria apo pushteti vendor tenton të bëjë devijimin e tij, do sjellë problematika për banorët e Tragjasit, Radhimës, dhe bizneseve të shumta. Kemi parë mbështetje edhe të këshilltarëve të PS, që i janë bashkuar protestës, dhe jashtë kamerave kanë shprehur solidaritet.

Uji është element jetësor. Tentativa për devijimin e burimit është për llogari të klientëve të qeverisë që po zhvillojnë resorte, dhe sjell katastrofë për zonën. Kanë qenë mbi 200 forca policie të FNSH-së dhe policë civilë, që kanë ushtruar presion ndaj banorëve, që kanë dashur kontakt me firmën zhvilluese, për t’i thënë që s’janë dakord me këtë investim. Kërkohet t’i jepet akses zonës bregdetare të Palasës dhe Dhërmiut.

Banorët s’kanë pasur asnjë njoftim. Kryetari i bashkisë kishte premtuar se do bënte një konsultë publike për investimin, por kryetari dhe administrata e bashkisë i kanë bërë bisht konsultimit. Nëse do grabitet kjo sasi e madhe uji, kjo zonë do falimentonte”.