Miqësorja e dytë, tjetër barazim për Shqipërinë U-17

Shqipëria U-17, luajti miqësoren e dytë me moshatarët e Bosnje-Hercegovinë në stadiumin “Air Albania”.

Ashtu si ndeshja e parë, edhe ky takim u mbyll në barazim pa gola. Nga minuta e 63-të, Bosnja luajti me 10 lojtarë, pasi Marcetic u ndëshkua me kartonin e dytë të verdhë dhe rrjedhimisht të kuq pas një ndërhyrjeje të ashpër ndaj portierit Dervishi.

Gjithsesi as superioriteti numerik nuk mjaftoi, që kuqezinjtë të shënojnë një gol për fitore. Kombëtarja U-17 mbylli kështu përgatitjet e radhës që po kryhen para ndeshjeve të fazës Elite Round të Kampionatit Europian 2023.

Shqipëria është shortuar në Elite Round në grupin 8 së bashku me Francën, Zvicrën dhe Letoninë dhe të gjitha ndeshjet e kësaj faze do të luhen në vendin tonë në muajin mars.