Athina ndërton Muzeun e ri Arkeologjik, 300 milionë euro për ndërtesën ku do të ekspozohen 125 mijë objekte

Athina do të ketë një muze të ri arkeologjik, me një kosto prej rreth 300 milionë euro. Muzeu, një nga më madhështorët, sipas grekes “Proto Thema”, do të përbëhet nga godina e vjetër e muzeut dhe një godinë e re dhe do të jetë gati për pesë vjet.

Kryeministri Kyriakos Mitsotakis dhe arkitekti me famë ndërkombëtare, Sir David Chipperfield, pritet të japin detaje mbi muzeun e ri më 15 shkurt.

Ndonëse gjithçka dukej si një ëndërr thuajse e parealizuar për shkak të vështirësive të shumta që lindën ndër vite, projekti "Muzeu i Ri Arkeologjik" duket se është një realitet i prekshëm tashmë pas propozimit të arkitektëve David Chipperfield dhe Alexandros Tombazis.

Nisjes së punimeve i ka pararirë një punë e gjatë që nis që nga rregulloret e duhura legjislative, studimet paraprake për të bërë të mundur përgatitjen e një studimi të draftit arkitektonik.

125 000 thesare të lashta do të ekspozohen në një hapësirë të dyfishuar që do të unifikohet dhe zgjerohet, si në godinën e vjetër të ruajtur - e cila gjithashtu do të rinovohet - dhe në ndërtesën e re, me dizajn të përbashkët të brendshëm.

Ministrja e Kulturës dhe Sportit, Lina Mendoni, tha se projekti i zyrave të David Chipperfield dhe Alexandros N. Tombazi ilustron vizionin, krijon një pikë referimi unike në strukturën urbane dhe ka në qendër njerëzit.

Ai tregon dimensionin kombëtar të Muzeut Arkeologjik Kombëtar, i cili e lidh atë me skenën globale. Dua të theksoj se të gjitha propozimet e paraqitura janë të cilësisë, estetikës dhe vizionit të lartë dhe plotësojnë plotësisht specifikimet që kemi vendosur.

Historia

Muzeu i parë arkeologjik kombëtar në Greqi u krijua nga guvernatori i Greqisë, Ioannis Kapodistrias, në Aigina, në 1829. Më pas, koleksioni arkeologjik u zhvendos në disa vende ekspozimi deri në vitin 1858, kur u shpall një konkurs ndërkombëtar arkitekturor për vendndodhjen dhe arkitekturën e muzeut të ri.

Vendndodhja aktuale u propozua dhe ndërtimi i ndërtesës së muzeut filloi në 1866 dhe përfundoi në 1889 duke përdorur fondet e Qeverisë Greke, Shoqërisë Arkeologjike Greke dhe shoqërisë së Mikenës.

Donatorët kryesorë ishin Eleni Tositsa, e cila dhuroi tokën për ndërtimin e muzeut dhe Demetrios dhe Nikolaos Vernardakis nga Shën Petersburgu që dhuruan një shumë të madhe për përfundimin e muzeut.

Emri fillestar i muzeut ishte Muzeu Qendror. Ai mori emrin që ka aktualisht në 1881 nga Kryeministri i Greqisë, Charilaos Trikoupis. Në 1887, arkeologu i rëndësishëm Valerios Stais u bë kurator i muzeut.

Gjatë Luftës së Dytë Botërore muzeu u mbyll dhe objektet u mbyllën në kuti të veçanta mbrojtëse dhe u varrosën, për të shmangur shkatërrimin dhe plaçkitjen e tyre. Në vitin 1945, ekspozitat u hapën përsëri nën drejtimin e Christos Karouzos dhe Semni Karouzou.

Krahu jugor i muzeut strehon Muzeun Epigrafik me koleksionin më të pasur të mbishkrimeve në botë. Muzeu i mbishkrimeve u zgjerua midis viteve 1953 dhe 1960 me dizajnet arkitekturore të Patroklos Karantinos.