Policia italiane, ka sekuestruar mbi 414 kilogramë hashash në Guidonia, që dyshohet se do të shpërndahej në tregun e drogës në Romë dhe provincë. Vlera e lëndës narkotike në tregun me pakicë vlerësohet në mbi 4 milionë euro, sipas mediave italiane.
Në pranga ka rënë një 29-vjeçar me origjinë shqiptare, i akuzuar për posedim të lëndëve narkotike me qëllim trafikimin. Kontrollet nisën pas dyshimeve mbi lëvizjet e të riut pranë një ndërtese në zonë. Ai u ndalua ndërsa po përpiqej të ngarkonte në bagazhin e automjetit disa valixhe të mëdha. Brenda tyre u gjetën rreth 98 kilogramë hashash.
Hetimet vijuan pas gjetjes së një tufe çelësash në posedim të 29-vjeçarit. Çelësat çuan autoritetet drejt disa ambienteve të përdorura si depo dhe pika shpërndarjeje në Guidonia dhe Romë. Në njërën prej strukturave, një sasi e konsiderueshme droge ishte fshehur brenda frigoriferëve, të cilët ishin përshtatur për ruajtjen e lëndës narkotike.
Gjatë kontrolleve, përfshirë edhe një garazh, u gjetën materiale për paketimin e dozave, si dhe disa shënime të shkruara me dorë që përmbanin të dhëna mbi sasinë dhe llogaritjen e drogës. Në përfundim të operacionit, sasia totale e hashashit të sekuestruar kaloi 414 kilogramë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
