Konflikti institucional për pagat e sistemit gjyqësor po përshkallëzohet me shpejtësi drejt një përplasjeje të paprecedentë ligjore. Vetëm një ditë pas dorëzimit të një kallëzimi penal pranë Prokurorisë së Posaçme (SPAK), gjyqtarët dhe prokurorët e Republikës së Shqipërisë kanë nisur një tjetër betejë paralele, duke depozituar një padi në Gjykatën Administrative, përmes së cilës kërkohet bllokimi i llogarive të Thesarit të Shtetit.
Sipas raportimeve të gazetarit Arsen Rusta për MCN Live, kjo lëvizje vjen si pasojë e ngritjes së pretendimeve për shpërdorim detyre dhe katër vepra të tjera penale që lidhen me mosezekutimin e një vendimi gjykate dhe mosdhënien e pagave pa asnjë shkak të ligjshëm.
Në lidhje me këtë situatë kritike, gazetari Rusta ka sqaruar se, “nëse një ditë më parë patëm një kallëzim penal, duke kërkuar nga prokuroria e posaçme marrjen në përgjegjësi penale të këtyre zyrtarëve për shpërdorimin e detyrës dhe katër vepra penale në mosezekutimin e një vendimi gjykate, konkretisht për mosdhënien e pagave pa shkak, sot kemi një tjetër betejë ligjore, e cila, edhe pse duket pa zhurmë, është mjaft e rëndësishme”.
Në qendër të këtij zhvillimi është Gjykata e Rrethit Gjyqësor Durrës, e cila ka marrë iniciativën për të kërkuar një masë sigurie të jashtëzakonshme përpara trupës administrative. Duke shpjeguar natyrën teknike të kësaj kërkese ligjore, Rusta ka nënvizuar se, “është Gjykata e Durrësit ajo e cila ka bërë kërkesën për sigurim padie, që për ta thënë më thjesht funksionon njësoj si rasti kur një qytetar ka një borxh të pashlyer ndaj shtetit, ku nëse ti i lë pa paguar dritat apo ujin, shteti i drejtohet gjykatës me një titull ekzekutiv dhe shuma automatikisht të bllokohet në bankë, duke bërë që ti mund t'i kesh ato para, por nuk i përdor dot derisa të shlyesh borxhin”.
Kjo kërkesë drastike për sigurimin e padisë nuk kufizohet vetëm te rrethi i Durrësit, por ka marrë mbështetjen e gjerë të të gjitha strukturave kryesore të drejtësisë në vend. Gazetari ka bërë me dije se kësaj nisme i janë bashkuar institucionet më të larta të sistemit, duke deklaruar se, “pikërisht kjo kërkesë e Gjykatës së Rrethit Gjyqësor Durrës, por jo vetëm e saj, pasi edhe Gjykata e Posaçme, prokuroritë e juridiksionit të përgjithshëm, Gjykata e Tiranës e po ashtu edhe Gjykata e Lartë i janë drejtuar Gjykatës Administrative, duke kërkuar që Thesari i Shtetit të bllokohet derisa ky institucion të pranojë të shlyejë pagat sipas listëpagesave për të gjithë administratën gjyqësore të Republikës së Shqipërisë, duke nisur nga Gjykata Kushtetuese, Gjykata e Lartë e deri tek gjykatat e juridiksionit të përgjithshëm si Berati, Durrësi, Kukësi apo Vlora”.
Seanca gjyqësore për shqyrtimin e kësaj kërkese për sigurimin e padisë është planifikuar të zhvillohet ditën e sotme në orën 12:00. Nëse Gjykata Administrative vendos ta pranojë këtë kërkesë, Thesari i Shtetit do të përballet me ngrirje të llogarive, një masë që pritet të sjellë pasoja të forta zinxhirë për të gjitha transaksionet financiare të qeverisë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
