Pas kallëzimit penal, beteja ligjore e gjyqtarëve dhe prokurorëve kundrejt ekzekutivit për çështjen e pagave ka kaluar në një tjetër nivel dramatik. Ditën e sotme pritet të merret një vendim që mund të paralizojë financat e vendit.
Gjykata Administrative do të shprehet sot në orën 12:00 lidhur me kërkesën e parë të magjistratëve, të cilët kanë depozituar një padi me objekt: bllokimin e Thesarit të Shtetit deri në kalimin e plotë të pagave të tyre.
Përplasja ka arritur në pikën kulmore ku vetë institucionet kryesore të drejtësisë po kthehen kundër arkës së shtetit.
Gjykata e Durrësit ka kërkuar zyrtarisht sigurim padie. Ata kërkojnë bllokimin e menjëhershëm të Thesarit të Shtetit përmes zyrave të përmbarimit, po ashtu dhe Gjykata e Lartë i është bashkuar kësaj lëvizjeje ekstreme, duke kërkuar saktësisht të njëjtën masë sigurie për bllokimin e llogarive shtetërore deri në zgjidhjen e çështjes.
Kjo padi në Gjykatën Administrative vjen si vijimësi e përshkallëzimit të konfliktit, pasi më herët magjistratët kanë dorëzuar edhe një kallëzim penal për këtë çështje.
Pika e nxehtë e debatit mbetet mosindeksimi apo moskalimi i pagave të tyre sipas trajtimit të përcaktuar me ligj, gjë që ka bërë që trupa e gjyqtarëve dhe prokurorëve të ndërmarrë hapa radikalë që prekin drejtpërdrejt buxhetin e shtetit.
Vendimi i orës 12:00 pritet me interes të lartë publik, pasi një pranim i mundshëm i sigurimit të padisë do të sillte një ngërç të paprecedentë financiar për qeverinë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
