Një zjarr i shkaktuar nga goditjet e rrufeve, përfshiu zonat malore pranë fshatrave Bularat dhe Zervat, në Bashkinë Dropull duke vënë në rrezik serioz edhe zonat e banuara.
Flakët nisën në terrene të thepisura dhe të vështira për t’u aksesuar, ndërsa erërat e forta favorizuan përhapjen e shpejtë të zjarrit. Situata u përkeqësua brenda pak orësh, duke bërë që banorët dhe autoritetet lokale të përballeshin me një situatë emergjente mbremjen e djeshme e der mengjesin e sotem.
Forcat e Shërbimit Zjarrfikës Dropull ndërhynë menjëherë në terren. Të mbështetur nga autoritetet lokale dhe forcat e ushtrisë, zjarrfikësit luftuan gjatë gjithë natës me flakët, pavarësisht terrenit të vështirë dhe kushteve të pafavorshme atmosferike.
Ndërhyrja në kohë rezultoi vendimtare. Zjarri u vu nën kontroll përpara se flakët të arrinin banesat e para, duke shmangur një situatë edhe më të rëndë. Dëmet, sipas të dhënave paraprake, u kufizuan kryesisht në sipërfaqe pyjore dhe kullota, ndërsa fshatrat Bularat dhe Zervat i shpëtuan rrezikut të drejtpërdrejtë.
Pavarësisht kontrollit të flakëve, forcat zjarrfikëse vijojnë monitorimin e zonës për të parandaluar riaktivizimin e vatrave të zjarrit për shkak të erës.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
