Një operacion antidrogë i koduar “Roli” ka çuar në pranga tre persona në fshatin Mjekës të Elbasanit, pasi kishin përshtatur një lokal për përgatitjen dhe shitjen e dozave të kokainës dhe kanabisit.
Operacioni u finalizua nga Seksioni për Hetimin e Narkotikëve në bashkëpunim me Seksionin për Mbështetjen Operacionale të Hetimit, nën drejtimin e Prokurorisë së Elbasanit.
Sipas policisë, në pranga ranë shtetasit Denis Roçi, 26 vjeç (i cili kishte marrë lokalin me qira) dhe Leandro Qosja, 18 vjeç, i punësuar si kamerier në këtë ambient. Gjatë kontrollit në lokal u gjetën doza lëndësh narkotike dhe mjete për përgatitjen e tyre.
Hetimet u shtrinë më pas edhe në banesën e kamerierit 18-vjeçar, ku u gjetën doza të tjera kanabisi dhe një armë e ftohtë (shkop metalik). Për këtë arsye u arrestua edhe vëllai i tij, shtetasi Ersi Qosja, 24 vjeç.
Në cilësinë e provës materiale, policia sekuestroi dhjetëra doza lëndësh narkotike (kokainë dhe kanabis), 6 grirëse për material bimor, 3 peshore elektronike, 2 celularë dhe 1 shkop metalik.
Materialet procedurale i kaluan Prokurorisë pranë Gjykatës së Shkallës së Parë të Jurisdiksionit të Përgjithshëm Elbasan për veprime të mëtejshme.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
