Një 56-vjeçar është arrestuar në flagrancë nga policia e Vorës në kuadër të operacionit të koduar “Mesazhi”, pasi tentoi t'i merrte përmes kërcënimit për jetën një shumë prej 300,000 eurosh kushëririt të tij.
Sipas njoftimit të policisë, kallëzimi është bërë nga shtetasi E. M., pasi në portën e banesës së tij, në fshatin Gërdec, kishte gjetur një fishek dhe një letër me përmbajtje kërcënuese për jetën e tij dhe familjarëve, me qëllim për t’i dhënë shumën prej 300 000 eurosh.
Në kuadër të operacionit "Mesazhi", u bë i mundur identifikimi dhe arrestimi i shtetasit A. M., 56 vjeç, banues në Vorë. Gjatë kontrollit në banesën e tij policia gjeti dhe sekuestroi në cilësinë e provës materiale, municion luftarak, veshjet e përdorura gjatë ngjarjes dhe 1 aparat celular.
Materialet procedurale iu referuan Prokurorisë, për veprat penale “Shtrëngimi me anë të kanosjes për dhënien e pasurisë” dhe “Mbajtja pa leje dhe prodhimi i armëve, shpërthyese dhe municionit”
