Ylli suedez i muzikës pop, Zara Larsson, ka dënuar ashpër Shtëpinë e Bardhë të administratës Trump për përdorimin e paautorizuar të hitit të saj "Midnight Sun" në një video të TikTok-ut që pasqyronte aksionet e arrestimit dhe deportimit të emigrantëve pa dokumente.
Megjithëse audioja e këngës është hequr pas reagimit të këngëtares, pamjet ku agjentët e ICE-së prangosin njerëz mbeten ende të dukshme në llogarinë zyrtare të Shtëpisë së Bardhë, e cila kishte vendosur mbishkrimin ironik "deportime të pafundme" (duke luajtur me vargjet origjinale të këngës)."
Në një video përgjigje që ka kaluar 4.2 milionë shikime në TikTok, Larsson nuk i ka kursyer kritikat e ashpra. Ajo e quajti videon "kaq çnjerëzore" dhe kritikoi faktin që vuajtja e njerëzve të vërtetë po kthehet në një "meme" argëtuese për rrjetet sociale.
Këngëtarja theksoi se shumica e njerëzve pa dokumente janë thjesht njerëz të rregullt me punë që kërkojnë një të ardhme më të mirë, duke shtuar se Shtëpia e Bardhë po përdor artin e saj për të mbjellë përçarje.
Larsson ripostoi një pjesë të klipit dhe u shfaq duke bërë shenjën "L" (Loser / Humbës) me gishtat e saj në ballë, drejtuar administratës. Ajo kishte reaguar edhe më herët kur hit-i i saj "Lush Life" u përdor si sfond muzikor për videot ku Donald Trump shfaqej duke kërcyer.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
