Mbytja e tragetit në Paqësor, më shumë se 30 të zhdukur

Më shumë se 30 persona rezultojnë të zhdukur pasi trageti MV Matui u mbyt të premten e kaluar në brigjet e Vanuatusë në Oqeanin Paqësor. 

Anija po lundronte midis ishujve Ambae dhe Santo me 47 persona në bord. Ekipet e shpëtimit shpëtuan 15 pasagjerë dhe nxorën një trup, raportoi dje Zyra e Kryeministrit. 

Operacionet e kërkimit vazhduan deri të dielën dhe do të përqendrohen në bregdet nga e hëna, ku rrymat mund të kenë transportuar ndonjë të mbijetuar, në vend që të jenë në ujëra të hapura.

Sipas Zyrës së Kryeministrit, aksidenti mund të jetë shkaktuar nga erërat e forta dhe mosndjekja e paralajmërimeve për det, si dhe nga neglizhenca e mundshme, përfshirë mbingarkesën e tragetit. 

Shërbimi kombëtar i motit kishte lëshuar një paralajmërim për erëra të forta dhe det të trazuar që në ditën e nisjes. 

Vanuatu është një arkipelag me 83 ishuj në Paqësorin Jugor, afërsisht 1750 kilometra në lindje të Australisë veriore.